Hesen Dewran, sera 1958 Dersım´de ame dina. 1977 ra nahet Almanya´de maneno. Ewru şinata ho psikoloji de gurino. Kılamunê ho, şiirunê ho, eve Almanki Tırkki u Zazaki nusneno. Ave Almanki hata ewru 4 kıtavê ho vejiyay. Na kıtavu ra ju ki çarniyara İngilizki. Serra 2001 de eve muzik dı CD ho vejiyay, ninera ‘Nähe und Ferne‘ (Nejdi u Duri) eve gıraniye Almanki, “Hazar Reng – Hazar Veng” ki eve gıraniya ho Zazakiyo, tede taê misali eve Tırkkiyê. Hata ewru xeyle pêserokunê made Ayre, Piya, Ware, Raştiye´de ... eve Zazaki (yane Kırmançki, Dımılki) kılamê /şiirê ho nêşr bi. Zonayiso (informasyono) hira na sitede pelgunê Almaki dero.

ZONÊ MA

Zarance kuna kemeru,
Zonê hode wanena.
Qılancıke
nisena gıle dare ra,
Zonê xode qıştnena.
Amnon yeno, beno germ,
Temuz zonê hode cızeno.
Mor u mılawın,
Teyr u tur,
Pil u qız,
Cin u ciamerd,
Serre na dinade her çi,
Zonê hode waneno.
Serre na dinade
her çi, her kes
zone hode gırano.
Wertê ninera
ça teyna ma
zonê hora vozdame!
Ça teyna ma
zone hora rememe!
Ma rememe kata some?
Zazaki zonê mao.
Bav u kali qeseykerdo.
Lawıki vatê, sanıki vatê,
Zonê ma zof şireno.
Zonê ho ça vindkerime,
Zonê sari ça ser kerime,

Zonê ho ça bın kerime!
Zonê sari ça ser kerime!

Zonê ma ke bi vind,
Ma ki beme vind!
Lawıki bene vind,
Sanıki bene vind,
Roşt bena vind,
Tari maneno!
Beme lal, beme kêr,
Beme bê pa u bê per,
Kume bıne destu,
Gıneme vêrrê dêsu,
Halê mare u waxt
her kes huyino,
- ne ke her!

H. Dewran

WELATO ŞİREN

Welato şiren mı virdero,
Koyê zerrnin mı çımderê,
Bınê vorede payrayê,
Verva tiji de bıluşkinê,
Hegau ra, mergu ra,
gorgeçin perenê ra, nisenê,
               mırê ju lawıkê vanê.

Zern u şêm uzadero,
Verg u hes uzadero,
Esq u çef uzadero,
Hasreta mı, kesreta mı
                     uzadera.
Welatê mı zof şireno.

Welatê mı zof şireno, jê cenneto,
zerre de adırê cenemi vêseno.

H. Dewran

EZ TU CÊRON

Ez tu cêron, tu kotiya,
Usar amê, pepug amê, tu niama,
Ez tu cêron, tu kotiya.
     Tu bêvenga, tu bêzona,
      Tu sermayena...

Dersım de, Erzıngan de,
Şevaz de, Varto de,
Ez tu cêron tu kotiya,
Palu de, Piran de,
Bıngol de, Xarpêt de,
Ez tu gêron tu kotiya,
Soyrege de, Siverek de

Usar amê, pepug amê, tu niama,
Ez tu cêron, tu kotiya…
Amnon ame, temuz ame, tu niama,
Ez tu cêron tu kotiya, ez tu cêron tu kotiya

H. Dewran

HO BISEVEKNE, HORA HASBIKE

Ho bısevekne, hora hasbıke,
Rawa sari de ho mekıse,
karê sari de ho telef meke,
en vırende hora hasbıke,
dımera yiyê binura.
Cori ho vıra meke,
to ke hora hasnêkerd,
kes tora hasnêkeno.

Rew mexapiye,
Raver meso, rew memıre,
eve vatena sari ho megoyneno,
eve vatena sari ho mepoyneno.

Bıngehê ho çipke,
Hode hast ve, royê rast ve,
To ke hode biya hast,
U waxt mau piye hode ki bena hast,
çêyê hode, hometa hode ki bena hast.

Weşiyede hast ve, dina de hast ve,
Hode hast ve, royê rast ve.

To ke biya voreke, tu ke biya miye,
Dormê tode vergi benê deyra.

Weşiye wesa, reyna peyser nina,
En weşiya xıravıne, onciya
Merdene ra rında.

H. Dewran